王祖藍、萬綺雯、細細粒、張繼聰合演嘅《老表，你好嘢！》因收視好，佢哋合作拍無綫古裝新劇《食為奴》，原先呢套劇由林峯、吳卓羲、陳法拉等演出，𠵱家卡士唔同晒。噚日一班演員喺將軍澳電視廣播城試造型，祖藍、張繼聰同高鈞賢通通要剃頭。
萬綺雯劇中做廿五、六歲嘅街頭賣藝女，被迫同祖藍結婚但就暗戀張繼聰，祖藍教萬綺雯要喺無綫立足要同人打交道，要識得巴結其他人喎。另外祖藍喺《老》中踩界撈埋製作但被彈，佢話：「今次係人揀我，劇本選角都冇份參與，畀人話仲唔夠咩，今次齋做演員。」
張繼聰光頭核突
張繼聰噚日到灣仔練波，佢話囝囝摸佢光頭話核突：「如果佢再話我，我剃光埋佢個頭。」另外，細細粒同鬼妹陳明恩前晚到紅磡出席薛家燕新城節目《開心家天下》嘅開年飯，細細粒同鬼妹即場獻唱，兩人事前刻意禁食，細細粒話：「冇食嘢，因為食咗胃氣勁，下晝只食咗三塊pizza咋。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/