咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
當舊年11月哈利列納上任昆士柏流浪（QPR）領隊後，唔少人都期望呢位球壇老狐狸可以創造奇蹟，但嚟到2月底，QPR嘅表現的確有改善，但成績仲係唔掂，繼續排包尾。由上周六對曼聯嗰場比賽所見，雖然QPR輸兩球，但防守算係對辦，只係佢哋真係唔識組織攻勢，畀唔到威脅紅魔。
喺嗰場波，QPR喺禁區入面得5次攻門，其中喺小禁區附近嘅3次都係靠死球攻勢，由中堅基斯杜化森巴埋門，至於其餘兩次埋門，就係來自雷米同泰拉拔嘅施射。用另一方向去睇，QPR今場只得3次中目標攻門，森巴竟然佔咗兩次，雷米亦只得一次。
小弟嗰晚有睇場波，覺得曼聯冇出盡全力，加埋傑斯同拿尼都唔係防守高效嘅球員，所以畀好多機會QPR喺中場組織；但QPR喺生波都造唔出咩威脅，竟然只能靠森巴，可見佢哋喺組織攻勢方面真係好有問題。
睇番QPR近幾仗嘅陣容，都好忠於4-2-3-1，並冇大變陣，但單箭頭嘅位置卻場場換人。踏入2013年後，QPR踢過7場聯賽，泰拉拔3次踢前鋒，雷米就兩次，森莫亞同占美麥基都各有一次。英國球評人Michael Cox早幾日喺專欄指出，QPR擁有4大射手係個幸福嘅煩惱，因為佢哋4個都係唔同類型，雷米係速度型，森莫亞係target man，占美麥基係全能勤力型，而泰拉拔就係偽9號；但由於類型唔同，適合佢哋每個嘅戰術都唔同，睇嚟哈利列納要喺呢方面研究研究。文：咖喱