近排做咗廣東省政協嘅律師會會長葉禮德，帶記者遊花園技巧更上層樓。噚日律師會搞新春傳媒團拜，記者例牌問佢點睇包官嘅法治烏雲論，佢答：「任何國家嘅法治唔捍衞，都會俾人侵蝕。」聽到現場記者一嚿雲。咁即係香港有冇烏雲呢？葉禮德話社會上有唔同形容，有人覺得係烏雲、打風，又話傳媒報道就多咗人留意；佢身為會長冇個人立場，個會亦唔會形容𠵱家情況。記者問多兩問，佢先話睇唔到香港法治受侵蝕。呢個時候，副會長熊運信無啦啦補多句：「通常打完風之後，天氣都幾好。」葉禮德接住搞爛gag：「最緊要打風時唔好受傷！」