開心買鞋，唔開心買鞋。但如果你早排買咗「鞋王」百麗（1880）的股票嘅話，海迪就肯定你係唔開心居多。百麗向來在投資者心中都有個光環，唔少分析員講起呢隻股票總係就住就住。因為奢侈品股（Discretionary）中，百麗是少有具備良好track record，兼在市場有絕對領導地位。佢喺內地市佔率超過40%，排第二名嘅只係得6%。連埋體育用品分店，全國銷售點有1.76萬個。鞋王之名，確實非虛。
所以，當其他內需股嘅銷售數字陸續撻Q，大家仍心存僥倖，主觀希望百麗可以免疫，最後當然就「瀨嘢」。百麗單係開舖，舊年就開咗2,600間，增幅18%。由於佢大量零售點都喺百貨公司之內，百貨店過度擴張、老化嘅問題，同樣存在喺百麗身上。海迪估鞋王𠵱家頭痛嘅係，如果要保持增長，惟有繼續擴大規模，取代老店；但市況轉弱，新分店要ramp up需要更長時間，咁幾時先可以追回正常嘅盈利水平？
一位向來睇trend準繩的分析員朋友預測，百麗要解決呢個結構性問題，相信要兩至三年。如果佢估計準確，百麗股價短線企穩喺14蚊，就只會係佢漫長de-rate（估值降級）過程嘅第一站。
海迪