星爺周星馳執導嘅《西遊．降魔篇》，分紅問題解決了！該片股東之一比高（8220）噚晚出通告，指根據合作協議，喺內地負責《西遊》運營同發行嘅華誼兄弟，除咗可收到內地發行毛收益12%嘅代理費外，票房分紅、分成收益都會預埋佢哋。
華誼喺《西遊》嘅身份一直係個謎，該片上畫以來，華誼堅稱自己有份投資《西遊》，但根據比高以往嘅講法，《西遊》股東只得比高、文化中國（1060）、威秀亞洲同埋安樂影片，今次比高可以話係畀個名份華誼。
比高仲畀多個喜訊股東，截至周日（24日），《西遊》內地票房已超過9.9億人仔，講緊只係短短15日，雖然數字未經官方核實，但偏差唔大，要擊敗《泰囧》逾12億人仔票房，應該易過取西經。