今年係蛇年，立法會主席曾鈺成噚日喺新春午宴致辭時，竟然猛講蛇嘅「壞話」，笑言諗唔到關於蛇嘅恭賀說話，摷嚟摷去都係虎頭蛇尾、蛇蠍心腸呢類唔啱使嘅成語。八方見佢越講越起勁，由中國文化講到西方文明，仲「拉布」到《伊索寓言》故事，話 「蛇係比喻好惡毒，恩將仇報」。
好一句「恩將仇報」，令人聯想到小人喎。唔怪得當曾鈺成講呢句話時，台下嘅狼振英笑容有啲僵硬。八方即時諗起前梁營重炮手尖啤仆心仆命為佢助選，點知俾人用完即棄不特止，仲被迫到要揚言跳國金，又心臟病發。唔知狼英係咪同八方一樣，聽到此處想起昔日戰友，心有戚戚然，所以皮笑肉不笑呢？
不過曾鈺成仲意猶未盡，連《聖經》都講埋，話如果唔係有條蛇誘惑夏娃，人類仲係唔着衫喺樂園度吊吊揈，邊得嚟咁過癮，咁多是非吖。