狹窄的後巷，推着小推車的菜販往來走，同時間，買完餸的街坊同執着相機的文藝Look青年們，在同一條窄巷欣賞同學和街坊們的藝術作品，分享生活意念，講出來一切像格格不入，但查實又配合得好自然。
記者：陳慧敏 攝影：伍慶泉
周街展覽搞乜鬼
身為城外人，昔日去九龍城，不外乎「買大閘蟹」、搵食，或博一鋪撞吓發哥同蔡瀾。翻查近年有關九龍城的新聞，「起動九龍東」以後，就是啟德發區、年中落成的郵輪碼頭，「渣」一聲賣晒的The Avery、同前後落成的七個新樓盤。
「周街展」發起人Kobe，是今屆兆基創意書院視覺藝術系的畢業生，又在活化廳做了兩年實習。Kobe：「我喺九龍城生活咗19年，為了總結一下歷年所得，又想連結上自己熟悉嘅社區。想同街坊有交流兼面對面溝通，搞個展覽係最簡單的方法。」於是用了四個月時間，連結廿多個藝術家、一起讀藝術的同學，以及區內街坊店舖，一起辦了這個為期一周的周街展，藝術作品同意念散落街角及店舖裏，邊走邊問，才能看到最多。
Kobe的作品落戶在城南道街頭，九龍城有名的泰國街。街上住了好多泰國人，有好多泰式舖頭同餐廳。你去泰國旅行，都會學幾句泰語傍身，然而在城南道，你有幾可無啦啦用泰文跟店主打招呼或拜年？於是她找了幾個會泰國小朋友，教她日常泰語，將錄音配上廣東話字幕：「講嘅都係好日常嘅『你食咗飯未』、『你去邊』之類。成件事都在泰國街上發生。啲小朋友都好願意幫手，佢哋嘅父母又唔怕你係拐子佬，呢啲都係一種信任，呢種信任只會喺舊區先搵到。」
跟着我們逛九龍城
街坊們，買餸的、湊孫的、看店的，總有他們的生活路線，外來的學生們遊走其中，看到的，都是他們細意找尋的成果。有些作品散落於社區中的每個角落，如黃曉楓的「我們的紙飛機」，本就喜歡跟陌生人聊天的她，在區內訪問了好多老人家，搜集他們或已遺忘的童年夢想，寫在紙飛機上，並散落於社區的各個角落。「我比老人家們晚出生好多年，完全唔同嘅生活環境，會有好多唔同嘅生活故事。但係喺訪問過程裏，發現原來呢班老人家以前根本冇夢想，當年佢哋只諗到點樣搵食點樣養家人，反而教返我哋轉頭。有時同啲老人家傾偈，一講就講成個鐘，其實佢哋心裏有好多囉囉攣的事或心事，但若冇人問，佢哋就將心事一直埋藏下去。」每每講起老城區，「溫情」與「溝通」總成了「硬銷品」，然而，在現代的社會裏怎麼說還是不足。含蓄一點去表達的，還有盧樂謙的作品「身體健康」，他與豐盛時裝店合作，設計了些心肝脾肺腎的湯水養生秘笈，靜雞雞塞入出售的衣袋裏送給街坊，提點街坊們保健之道。可是有些衣服的衣袋太細，塞不落，老闆梁先生索性見街坊就派，一樣教大家關住保健之道。
作品：你聽到我的聲音嗎 陳曉彤
「每個人每個地方都一定有些故事，我們不主動講同問，是不會知道的。」
作品：身體健康 盧樂謙
Kobe：「本來想將這些湯水秘笈靜靜雞塞到衣服裏，但秘笈太大了，塞不進呀！」
作品：畫不出的豆香 陳嘉明
「我其實對這店好陌生，但在裏面，豪氣的老闆娘彩鳳，反而令我覺得好有人情味。」
作品：友朋小吃 何潔源
「記錄了跟朋友一起吃過的，九龍城裏的小吃店。」
作品： 污漬收集站編號1-17 黎加行
在活動的八條街上，各處貼了這樣的白紙，一星期後從紙上的痕迹，統計哪條街最多人走，或是最髒。
街坊參展有嘢講
除了學生們的創作外，我更期待看街坊們眼中的九龍城。菁蘆蜜蠟店的東主李煒衡在九龍城開店十多年，當牧羊狗「阿邊個」（真名！）的助手，完成作品「狗龍城」。李煒衡：「十年嚟阿邊個日日都帶我喺區內散步，啲人識佢多過識我！今年佢都十歲喇，通常一隻狗都只得十零年壽命，所以我想用佢嘅眼光，去記錄呢個城市，第時我都可以透過啲相懷念同阿邊個散步嘅日子。」
開攝影用品店的楊妙芬（Milk），以黑白及彩色照片，拼出了新舊九龍城不同的天空，Milk：「小時候常去的城寨又變了公園，以前只得三、四層樓的唐樓，隨便抬頭就看到藍天，每5分鐘一架飛機飛過，街口望到獅子山，環境好舒服，天空好近。現在則多了高樓。我不想它變得太多，拆呀拆的，那邊又被田生收購了，預計再過幾年一切又不同了，看不到九龍塘，視野會再變窄。」
作品：狗龍城 李煒衡
牧羊犬阿邊個，每朝帶老竇李先生散步，已是九龍城一道風景。
作品：九龍城的天際線 楊妙芬
攝影器材店的Milk，想念昔日抬頭盡是藍天的九龍城Skyline。
周街展
日期：即日至3月1日
地點：九龍城福佬村道至打鼓嶺道、賈炳達道至衙前圍道