上周五特別行會講雙倍印花稅，殺唔少人一個措手不及。行會成員兼新民黨主席葉劉淑儀噚日透露，吸收咗上次林奮強涉嫌偷步賣樓嘅教訓後，今次嘅保密同避嫌功夫做到足，聽完之後真係覺得安排恍如「寒戰式」嘅保密。
葉太話，當日開行會，手提電話已被扣起，亦唔知議程係乜，一去到開會，主事人已經叫任何成員同地產商稍為有瓜葛嘅人，都唔可以開呢次行會，點知有成一半人自動離開。葉太一打開咗個議程，就發現只有兩項，一個係雙倍印花稅，第二個係限制奶粉出境。八方聽聞，當日政府向傳媒放風，話行會係講奶粉，轉移咗傳媒嘅視線。
留低嘅行會成員亦要等財政司司長曾俊華開完記者會之後，先至可以離開行會會議室同攞返部手機，席間就有三文治同墨魚丸俾行會成員醫肚。