行政立法關係一向麻麻，難得噚日立法會舉行新春午宴，請咗狼英同一眾高官聯誼，不過開飯前雙方仍然要先「過兩招」，各自抽出三名代表比試。遊戲好簡單，就係「看圖噏名」，兩隊鬥講議員同官員名稱，最終主場嘅議員以一分之差落敗，做評判嘅主席曾鈺成即時「護短」，話賽果反映官員知名度唔及議員喎。
高永文見梁家騮忘形大叫
八方以為主場嘅議員隊贏硬，但抽出嚟玩嘅三人中，梁志祥係新丁、吳亮星就離開議會多年，只有湯家驊獨力支撐，結果生面口嘅審計署署長孫德基、行政署署長蔡潔如冇人認得，就連「頭號梁粉」嘅行會成員張震遠，三人噏到口唇邊都噏唔出，經驗老到嘅湯狀今次責無旁貸啦！
至於官員隊，主將係商務及經濟發展局局長蘇錦樑（Greg），show得卡片多嘅佢，當然好熟各黨派議員啦，至於自嘲係「新人」嘅食物及衞生局局長高永文就玩得最投入，一見到「行家」醫學界梁家騮張相即時大叫出嚟。另一代表，行會嘅史美倫就幾乎全程陪企。不過，三人都俾勞聯潘兆平考起，Greg蘇仲將自由黨批發及零售界方剛講咗成唔存在嘅「製衣界」。
玩完一大輪終於開餐，新民黨葉劉淑儀就同政務司司長林鄭月娥分享買唐裝嘅心得，葉太仲介紹林鄭去深圳、上海訂做旗袍。民建聯、經盟聯就趁機叫政府針對新沙士做好應對，八方聽聞林鄭席間話政府嚟緊會有全城清潔同宣傳活動。噢！咁林鄭唔知會唔會做新一任清潔大隊長呢？
mailto:[email protected]
