上個禮拜二，孫柏文同一眾fan屎話過想叫大家一注獨贏南華早報（583），不過因嗰日之前，《爽報》梁心欣話不問價追，所以搞到股價大飆兩成後停牌。當時想叫大家一注獨贏，原因係大股東Kerry（即郭鶴年）行使咗一批認股權證，2月底股權會過七成五。港交所（388）李小加已經話今日（2月26日）唔解決就停牌。
喺股權超標嘅情況下，一係佢喺低於資產淨值下配股減持，一係就博佢私有化。
火燎森挺一注獨
講起一注獨贏，前日，我以前商台財經節目《星火燎原》拍擋火燎森，發短訊話：「蔡東豪上個禮拜六朝早喺港台節目開我名，仲狂插一注獨贏！」
我一聽，心諗搞乜嘢呀，即問：「阿火你搞乜聽港台呀？」原來火兄搭的士去落馬洲時，因為司機大佬聽緊，所以聽港台。火兄仲問司機大佬點睇，原來佢完全同意蔡東豪嘅講法。睇完我問：「個司機知唔知佢載緊邊個？」
火兄答：「我落車時佢咪知囉，因為我同佢講我係邊個，仲要表明『一注獨贏is the best！』真係要拍電影至拍得番嗰種張力！不過我最唔妥係蔡東豪話我真人唔係一注獨贏。我股票真係只揸比亞迪（1211）。」呢個我都可以話係真，因為比亞迪害到阿火輸咗幾架Gallardo。我問佢蔡東豪鬧你今次一注獨贏比亞迪，你有冇學到教訓。火兄話：「教訓當然有。就係跌落低位時，要加注獨贏。」哈哈，真係頑固。至於我叫大家一注獨贏，噚日睇《爽報》300萬倉陳承龍都有講過，所以我唔再提，只係佢漏咗我回歸《蘋果》後第一隻一注獨贏中國全通（633），可能因一早升到到價所以冇講。
不過一注獨贏係要小心，因為如果你喺蔡東豪做精電國際（710）CEO嗰刻，以9.05元買，噚日收3.92元時，真係持股力要強過火燎森。好彩冇叫過一注獨贏精電國際！
孫柏文
獨立股評人
http://facebook.com/shuen
本欄逢周二刊出