金管局要求本港銀行3月起，分階段將舊式磁帶提款卡換做晶片卡，友人近日收到獅子行發出嘅新卡，發現卡面正式鏟走集團昔日經典口號"The World's Local Bank"（環球金融．地方智慧），真係決心change。
「鬼佬食白鱔」經典
滙控（005）兩年前展開精簡瘦身策略，退出唔少零售銀行市場，冇咁環球，唔用呢句口號都理所當然。講起呢句自2002年、前大班龐約翰年代創立嘅口號，不期然諗起佢哋嗰個「鬼佬食白鱔」電視廣告。
片中嘅英國老外，去到華人社區出席商務宴會，侍應奉上一大盤肥鱔魚湯米線，洋漢未食已嚇窒。佢唔知定，以為同華人食飯要舔埋碟底，否則唔畀面主人家。
華人老闆見佢擦清光，立即叫阿廚整多條巨鱔佢嘆，老外食到嘔白泡。廣告末段旁白話：「滙豐從來唔會低估地方智慧嘅重要」。
呢個口號𠵱家唔啱聽，確實冇聽好耐。2011年5月滙控舉行策略日冇耐，英國傳媒已經話，滙控將放棄"The World's Local Bank"口號，舵手歐智華認為呢句口號唔再反映集團發展策略。
據聞，滙控同年10月開始做嘢，從商業銀行開始，𠵱家去到零售層面，喺香港趁金管局要求佢哋幫客戶換卡，全面鏟走呢句口號，其實佢哋舊年底發新卡時亦開始做嘢了。
李華華
mailto:[email protected]
新game出爐 ～ 快啲試下自己有無辦法上車啦！
【「樓」年運程小測試】
http://www.tomonews.net/game/hkhousingpolicy/