沙膽虹早就提醒投資者，李嘉誠拆售的酒店雍澄軒根本買唔過，雖然比毗鄰住宅便宜一成，但身為業主亦要鬼鬼祟祟扮租客入住，要簽租約付房租，之後才退；又不可以自行大裝修，換鎖都唔得；將來酒店要翻新，業主有排夾錢；再加上契約新穎兼複雜，六千元做份契，搵律師做都難，分分鐘上身，律師唔敢做，銀行一樣唔敢按。
但是，這樣的樓盤，竟然也被搶購一空，三百六十個單位亦售罄，沙膽虹心諗，香港真的有這麼多有錢水魚？腦都唔用一下就落叠買一個幾百萬的單位，遲早要去長江中心拉橫額。怎料今次咁快，在付大定前夕，前天傍晚就有兩名買家報警，擔心受騙。
沙膽虹絕對不是幫李嘉誠，但對於報警的買家話，諗住信李嘉誠，咁有錢唔會呃人，早知責任喺自己度，一定唔會買，亦覺得戇居兼白癡。一個成年人大拿拿幾百萬買一個物業，都會只信李嘉誠，自己冇責任？買家都明知物業是酒店分拆，非一般住宅，也不多考慮一下？何況長實樓盤問題多多，五樓原來是地下，房間張床有大半在窗台上等等，香港人又不是不知，憑甚麼信？
沙膽虹建議，相信李嘉誠而落叠的買家，不如找長實傾傾，取消交易，當甚麼事都沒發生過，取回二十萬細定。如果李嘉誠唔肯，就只有撻定，唔見二十萬當交學費信錯人。最怕是臨約也有必買必賣條款，撻二十萬都甩不了身，長實出了名追到天腳底都追！
沙膽虹