政府後知後覺又一明證──第二套房double印花稅，冇錯係可以即時增加炒家成本，只可惜炒家早已絕迹，平貨盡入其手，樓價又高到冇朋友，照顧本地居民不知從何說起。
上周五建議買美高梅（2282），逆市走高3.2%，證明高息股於波動市況有睇頭。本欄1月底曾推介另一高息股信佳（912），其後半個月累升13%，近排隨大市回調，有望回補上升裂口，戰友可重新關注。
信佳主打電子產品、模具及塑膠產銷業務，最大賣點係過去10年均派息豪爽，以2012年度中期息7仙計，現價息率3.2厘；假設末期息與去年一樣，全年派息將達17仙，息率高達7.8厘，好過唔少藍籌及REITs。除回報吸引，信佳估值亦平得交關，現價年度化市盈率僅6厘，受惠美國經濟持續復蘇，估值只會更平。信佳上周五收報2.17元，跌0.9%，冇貨既戰友可候回試2.10元水平吸納，中線目標三字頭不變，潛在升幅43%。
唐牛