王維基的香港電視雖然還未獲發牌，但仍派出藝人唐寧、梁小冰、元華和郭峰等出戰昨日舉行的馬拉松，眾藝人都非常有體育精神完成賽事，相反無綫派出知名度較高的李詩韻、古明華、黃智雯、徐子珊和陳展鵬等，可能無綫是直播賽事的單位，不過撐場的小生花旦亮相起跑點後中途已離開，全部揸流攤，不及死敵香港電視般認真。
徐子珊承認假跑
無綫昨日派出徐子珊和陳展鵬等40名藝人參加10公里賽事，昨日凌晨6時在東區走廊起步，只有一半人完成比賽，身穿皮褲和斜孭小手袋的徐子珊承認假跑，她笑說：「都係志在參與，因為一陣要開工，今日兩點要起身化妝，成晚都唔敢點瞓，怕唔知醒。」子珊表示自己身子弱，不想出醜，她說：「本身打壞，行上嚟都扯晒蝦，我諗我10公里真係要行兩個鐘，真係行都唔得，仲要我怕尷尬，一陣要吸氧氣咪好瘀。」
噸位十足的細細粒陳嘉佳也換上短褲作狀出賽，她直言首次參加馬拉松，她說：「我行上來都扯蝦，出年想參加，跑唔到都可以行，同埋大會派蕉，我應該可以食到10隻蕉。」細細粒自爆少做運動：「人哋話瞓覺都係運動，所以我將大部份時間放喺瞓覺度。」無綫代表之一的梁琤和狄易達則認真落場比賽，首次參賽的梁琤說：「第一次跑1小時16分，成績算唔錯，可能有武功底，平時有做太極同瑜伽。」
王維基貼心安排
大會安排維園有媒體中心，無綫、商台甚至有線都可自由進入，惟獨香港電視被禁足，未知可與無綫是大會直播唯一單位有關。王維基安排藝人到附近銅鑼灣運動場設攤位讓藝人休息，現場還請來7名按摩師和食物到會，王維基落本兼貼心安排令藝人都感到窩心，王維基說：「今年我冇跑改嚟打氣。」對於有指無綫出招令香港電視未能進維園媒體中心，他說：「呢個係大會安排，冇所謂。」
無綫藝人半數揸流攤，王維基說：「唔係專業問題，參賽平時需要運動，呢行工作咁辛苦，我哋嘅藝人全部跑晒10公里。」完成10公里的梁小冰也說：「我用兩個鐘完成，公司咁貼心安排好感動。」
採訪：卓寶花、楊潔雯
攝影：仇志德
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/