金融界元老桂徵麒先生（Randy Kwei）出版自傳（國際金融睿智──桂徵麒四十年投資生涯），左丁山先睹為快，先至知道Randy爸爸就係桂中樞，套用陶傑一句，民國好有風範嘅人物也。桂中樞生於1897，出生地係四川一條小村開縣，家境富裕，十一歲到北京讀書，此後再不還鄉，後考得美國庚子賠款獎學金，到威斯康辛大學就讀，畢業後再入哥倫比亞大學新聞學院，之後竟可以加入紐約時報做記者，報道1920-22年第一次大戰後巴黎簽訂凡爾賽和約，可見桂中樞讀書成績與英文水平之高，1920年喎，有幾多位中國留美學生可以加入紐約時報呀！
唔怪得桂中樞在十九世紀20年代返回上海之後，就創辦英文《中國評論周報》（The China Critic），立即打響名堂，後來佢再到東吳大學攻讀法律，1928年成為律師，開設律師事務所，識咗一位帶着一個皮包到上海闖天下嘅美國青年C. V. Starr，此君創立一間保險公司叫做AIA，就聘任桂中樞為中國法律顧問，憑佢嘅超卓學歷，桂中樞律師好快就搵到唔少錢，住在法租界貝當路/高恩路交界一棟八層高公寓，有升降機，幾先進呀，而且桂家出入有司機，駕駛Studebaker（商用車），生活富裕，一直到日軍侵佔上海，至四五年八月戰爭結束，桂家一直生活無憂。到咗1948年，桂中樞審時度勢，知道大局不妙，就部署逃難，卒之在1949年來港，大半生積蓄隨風而逝，51歲人一家住在北角英皇道一間房，與上海優遊生活差天共地。
不過能知道要逃難避秦，始終係聰明人，遠勝於留在上海被毛澤東糟質至死嘅知識份子。1949年底桂中樞加入英文虎報當總編輯，從此恢復中產階級生活。桂徵麒兄弟得父親苦心培養，1952年9月兩人十七歲就坐總統輪船往三藩市再坐火車到紐約市轉往康湼迪格州讀中學，荷包內有父母給予嘅所有盤川共4000美元，當年係一筆好大數目，嗰陣時香港一般白領文員月薪還不到300港元！桂徵麒就由此考入耶魯讀電機工程，再到哥倫比亞大學讀金融碩士，開展職業生涯，兜兜轉轉1972年返到香港在花旗銀行負責電腦工作，轉來轉去卒在1980年再度來港就任運通銀行東北亞區主管，從此再以香港為家，至今仍然在港經營投資基金，算係落葉歸根。