上周曼聯訪港門票開售，引起全城「震盪」。 小弟最憎排隊，或許因此喪失很多精采節目；不過今次唔去琴行門口紮營，一樣可感受市面各種「奇景」。
首先是臉書洗版，卻非「跪求曼聯波飛」，而是「我冇曼聯波飛！」這都是體育傳媒行家，紛抱怨為何突然有咁多好耐冇聯絡的「朋友」，突然來電「打招呼」。我聽過一個最無辜案例：一報館體育編輯，被上司要求：「大老闆要兩張曼聯波飛，擺明俾位你上！你做咗十幾年編輯，呢期實掂啦！」令該位編輯當堂面青冒汗。其實小弟近日亦收到不少「委託」，借勢在此呼籲：本人並未持有，亦無渠道獲得曼聯波飛，謝！
第二奇景，是黃牛黨。據聞索價只高於票價一倍的瞬即售罄；更有6張門票打包過萬元出售，搶手程度媲美葵涌啲酒店房。其實淡季來回曼市機票5,000蚊有找；曼聯官網套票（一場波飛加兩晚酒店）唔使3,000蚊，5日英國睇波之旅隨時1萬蚊搞掂。搶黃牛的朋友，出價前，請冷靜！
其實正因牽涉盛事基金，才令是次賽事避不了要跟旅發局等合作而減少公開售票。我認為這是商業決定，無可厚非，最重要是扣起的門票係咪真係有人入場？旅發局的4,000票，我懷疑能否全數售出；曼聯扣起的1萬票，我更懷疑能否售出7成甚至一半。畢竟歐洲球迷在本土一季有五、六十場正式比賽，使鬼咁遠飛來香港睇場半力出擊的友誼波？若有門票滯銷，懇請當局盡早安排重售，否則好似09年東亞運決賽香港贏金牌一役，場外冇飛入場、場內空位多多，實暴動都似！
方柏翹
now足球評述員