年年渣馬都好受市民歡迎，政圈內亦有唔少捧場客。好似街工梁耀忠咁，98年經已係渣馬粉絲，一直喺全馬有唔錯表現。今年佢卻轉戰半馬，唔通年紀大、機器壞？咁講實在太睇小街忠嘞，查實佢今年係lead住失明人士李啟德跑，成績仲好過泛民戰友莫乃光同蔡耀昌㖭呀。
莫乃光話公務多練跑少
今年踏入60歲嘅阿忠，跑得依然好似舊時咁輕鬆。佢噚日全程用一條繩，帶領一位44歲全失明人士跑半馬，最終用咗2小時19分完成賽事，比平時佢哋練習仲快咗10至15分鐘㖭，佢哋查實都係練過四、五次咋。
阿忠話呀，由於有啲跑手戴住headphone跑步，所以自己有時要嗌成六、七次「唔該借借」，所花嘅氣力又因此多咗嘞。今次帶路成績咁好，阿忠當然想再帶啟德去唔同地區參賽，但佢笑笑口話，台灣跑就一定冇問題；如果要去廣州同澳門，恕佢未能幫拖，事關佢都入唔到境！
資訊科技界莫乃光今年跑渣馬半馬，首次多咗立法會議員呢個名銜，但係成績就比上屆慢咗10幾分鐘，用咗2小時39分完成賽事，佢話做咗議員公務纏身，賽前只練過兩、三次，成績算唔錯嘞。
支聯會亦有十幾人參賽，包括副主席蔡耀昌，蔡耀昌最終用近兩個半小時跑完半馬，佢同莫乃光一樣，歸咎民主黨內同地區工作太多，以致練跑時間唔夠。
現場所見，有跑手帶上V煞面具，亦有選手揮舞港英旗助威，好有氣氛！今年亦有跑手當眾求婚，高先生跑到抽筋，都要撐到係衝線時向27歲女友求婚，最後當然係結束咗愛情長跑啦。
mailto:[email protected]
