「唐宮」僭建下月中開審，唐英年心情似乎冇乜受影響，前日仲應邀出席電子傳媒行家舉行嘅飯局，講吓「紅酒經」。坊間盛傳唐唐只要呷啖紅酒，就講得出嚟自邊個酒莊，邊年釀製。無綫新聞前主播黃大鈞就攞咗支紅酒考吓佢，專登用白布遮住酒樽，唐唐嗒了兩口，就講得出嚟自法國波爾多左岸嘅酒莊，九十年代出產，答中八成！
支紅酒係1995年釀製，來自法國嘅Chateau Smith Haut Lafitte。呢個莊09年嘅出品，Robert Parker畀成100分㗎。大鈞同八方講，前日係一班電視台記者定期嘅私人聚會，有時都會邀請唔同嘉賓。除講紅酒經，唐唐仲同班行家玩「猜猜畫畫」遊戲，主持人寫低劉夢熊個名，點知佢就畫咗隻狼出嚟，搞到人人以為係狼振英。
啱啱做咗政協，唐唐心情唔錯，留咗半個鐘，雖然冇乜講到僭建官司，但都好風趣咁話，自已好鍾意動物，養咗六隻狗，唔少仲上過電視㖭。聚會上有人問到佢覺唔覺得香港記者好難頂，佢就話一啲都唔難頂，明白記者都係做份內事，新聞自由係香港嘅核心價值咁話。