第85屆奧斯卡頒獎禮今日舉行，雖然睇戲同炒股冇直接關係，但上周在港上畫嘅《林肯》屬大熱之作，湊熱鬧都要講番兩句，尤其係當中有一場戲，如果換轉喺職場，打工仔好易有共鳴。
《林肯》主要講林肯點樣喺限期前，爭取眾議院議員通過修憲廢除黑奴制，其中一場戲，林肯同幾位幕僚開會分析投票形勢，只差幾票就能通過修憲。林肯同幕僚講：「你哋仲有一夜、一日同一夜嘅時間去攞票，馬上去做嘢。」一位幕僚竟然問：「點做（how）？」林肯即時大動肝火：「我係美國總統，有最大權力，你會幫我攞到票！」。
若以上場景換轉係辦公室老闆同下屬嘅對話，心急如焚嘅老闆叫下屬務必攞到單生意，下屬仲夠膽唔識趣咁問how，老闆實回贈一句：「我係老闆，總之你同我死掂佢！」話時話，丹尼爾路易斯超似造型加神級演技演林肯，奧斯卡最佳男主角應該冇得輸。