立法會冇咗「潮州怒漢」金撈詹，不過換屆之後多咗幾個「潮」人新血，好似民主黨胡志偉、民建聯陳恒鑌（Ben）都係「架己冷」。阿Ben以「潮州仔」自居，最鍾意港九新界四圍去，搵潮州嘢食，佢笑言擔心日後搵唔到飯腳，所以趁早灌輸3歲大嘅囡囡潮州style，新年假仲返鄉下學做「潮」童。
阿Ben做咗幾個月議員，估唔到除咗建制議員外，同民主黨主席劉慧卿都傾得埋。佢自爆，當年科大讀書時曾經訪問過卿姐，仲要寫得好正面，笑言𠵱家有啲後悔，想竄改「歷史」。
阿Ben讀書時又搞過論壇講直選，民建聯派咗劉江華去，佢當時唔知呢個乜人，心諗可唔可以換曾鈺成。不過𠵱家入咗黨，當然知道三姓家奴嘅厲害啦。