上周五講到恒指跌穿保歷加通道下軸，係去年9月以嚟首次，睇埋恒指周線圖，MACD正式出現沽售訊號，睇嚟後市向下機會大過向上。
中線出現調整嘅話，由2月4日高位開始，個市至少玩謝短線友三兩個月，呢段時間見高追盞做炮灰，稍後只能趁恐慌性跌市先低吸。
晉佳觀察09年至今每次升市途中，周線MACD出現沽售訊號後，恒指未必即時急插，但中線調整或跌市肯定會殺埋身。
以2009年11月27日MACD出現沽售訊號為例，恒指當時21134，雖然之後喺2010年1月同4月分別升上22671同22388高位，但去到5月28日始終要跌落18971，半年時間，量度跌幅約2000點。
跌穿250日線撈好股
至於對上一次恒指周線圖MACD沽售訊號出現，係去年5月11日，當時恒指報19964，港股已急跌一個星期，同最近情況相若，之後四個星期繼續跌，超賣完可以再超賣，累積跌近2000點，去到6月8日低見18056至見底。呢個底，亦係去年6月至今嘅升浪起點。
按其他09年至今嘅個案，恒指周線MACD出現沽售訊號後，普遍都係未見底，所以現時唔應該太過樂觀。
假設牛市未結束，可以等跌2000點左右，去到略低於21000，跌穿埋250日線（20923），就係撈底黃金機會，所以晉佳維持等恐慌性買入嘅建議。
至於上周四恒指跌400點當日，下跌股份接近成千隻，不過當日仍然有內房股企得穩，睇嚟市況仲未夠恐慌，未形成恐慌性買入嘅條件，所以現階段只能等、等、等。
以上分析，係假設「牛市未結束」。由於近期跌市主要成因係憂慮中美收水，事實上，央行收水過往唔足以形成港股熊市，所以再睇長啲，晉佳相信恒指調整完就會再展開新一浪升勢，目前要一面靜心等機會，一面尋找有潛力爆升嘅備忘股。
晉佳
本欄逢周一、三及五刊出