又是一年一度的「港馬」，請容我再三呼籲，一個應該屬於港人的運動項目，現且成為城中盛事，根本沒有理由任得個別機構獨攬和壟斷，惜政府就是如此輕易且將主導權拱手讓人。而市民或參賽者起碼要有一份自覺，自己隔「渣」，然後正名。其實呢次活動都總算有啲進步，不過唔好意思，同大會安排怕且冇乜關係，始終積累咗咁多年經驗，再加上其他本地運動賽事望塵莫及的資源條件，基本上係冇得輸，然咁多年亦只有因循不見長進。
揹掛飾搶鏡 更具意義
至於我要讚嘅係今年件跑衫，無論質料、設計都好過去年，雖然我都係唔會着，因為對於稍有要求的跑手而言，始終未到收貨水平。然而件衫印咗一句話，又幾對口胃：「Run for Reason」。確是，每個人都應該有推動一己跑下去的原因。正如過往驅使我長跑和毅行的理由，其實個人得很，譬如說挑戰自己、磨練意志、又或減少平日「喪食亂飲」嘅罪疚感等。現在不是說沒有，只是更多的時候，會設想或考慮這件事對他人的意義多過自己，又譬如話，前嗰幾次全馬，完全不計較時間步速，只求陪盧太完成賽事。
今年盧太休戰「港馬」，我本已興趣索然，幸得一位「靚女」陪跑足全馬，方有點生趣……實情係我倆都是Green Monday的支持者，而這素食推動組織剛巧要招募選手代其出跑，我們自然樂於響應，仲要盛裝而至，即係好似這幾年嘅「鯊魚跑手」咁，藉馬拉松賽事萬人在途的大好機會，宣揚「不再食翅」的訊息。雖然我哋嘅裝束冇咁大陣仗，但都吸引到唔少人注意。每當發現沿途拍攝的相機和攝影機，我哋就自會奔向鏡頭所在，還要倒跑以展示兩個背揹着的「搶眼」掛飾。跑姿滑稽倒不是問題，間或嚇親其他跑手，謹此致歉，刻意「搶鏡」亦只求曝光。
當我懷着一個與前不同的目的去參與同一件事，感受煥然一新，過往總要咬住牙根，頂住抽筋捱返終點，然後一副死樣。今次雖未致於輕鬆跑畢全程，惟過程中既是好玩，而且又是為了一個更大的使命而去邁步，焦點在外，自身體能上的虛耗和生理反應，都似不足道，完成後都仲可以談笑風生，至於時間亦不過就是慢了那10分8分鐘，剛好趕及與「辛格（Fauja Singh）」合照，對呀，這位人瑞跑手從來都是一位素食者。
今天又是星期一，我們未必可以在全馬賽道上相遇，惟盼能同走在Green Monday的行列中。
盧先亞