曼城上季戲劇性力壓同城死敵曼聯，登頂首次封王英超；惟今季球隊表現跌watt，踢了26輪賽事落後12分（未計上周六戰果），蟬聯機會渺茫。其實藍月亮今季表現不振有數得計，防守失誤太多成主要原因。
阿古路狀態下滑
曼城上季防守力冠絕英超，38場只失29球，主場更只失過12球而且未嘗一敗；鐵壁的防線及固若金湯的主場成奪標的一大原因。不過，今季藍月亮至今26場聯賽，已經被攻入24球，差不多每場都失波，比起上季平均每場只失0.76球，簡直是差天共地。防守力減弱最大原因，主要是因為防守失誤增加。到上一場作客爆冷不敵修咸頓為止，曼城今季已有17次防守失誤導致失波，比上季多7次。
「一隻手掌拍唔響」，曼城攻力減弱亦成問題。以主力射手阿古路為例，該阿根廷球員於去季登陸英超首季，34場轟入23球，最後一輪反勝昆士柏流浪的入球更是奪標關鍵。不過，今季他因傷病纏身，令入球效率大減，22場只入9球可算交唔到貨。亦有調查指阿古路偏愛射龍門的左下角，可能已被英超門將捉到路。文：利司基