上周有一則國內小新聞，有間工廠新春開工大吉時，一班員工先要落街長跑，咁有士氣咁注重運動？No way，原來係大懲罰，罰呢班員工上年返工唔夠落力。據有關老細話，若果新一年成績冇改善，下年仲要罰佢哋跑長啲，究竟呢招會否令到間工廠生意好咗就不得而知，之但係被迫跑多啲的話，同事話肯定有機會做出一個個新嘅pb。
成7萬2千人報了名，扣除大約1千個唔知醒、1千個真傷（好可惜我係其中一分子）、1千個假傷、1千個突然屋企有事等等，今日點都有6萬幾人落街齊齊跑，畫面震撼程度肯定勁過前兩日嘅5秒地震，跑手們面上嘅笑容亦肯定比國內被迫跑嗰一班員工多。
香港嘅馬拉松，特色係人頭多，但風景少，所以當瞇埋眼諗番過去呢幾年嘅賽事印象，反而係聲音多過畫面，聲音都係來自跑步中途其他跑手嘅。第一次跑，未出力先急尿，響西九嘅公廁巧遇中學阿sir，互相打氣嘅說話係有啲唔正路嘅：「痾快啲呀！」第二次跑，啱啱上三號幹線冇耐，身旁湧出一位多年不見的運動場老對手，想話寒喧一番時，佢已經眼尾露出一絲招積地放下一句：「加油呀！」然後加速絕塵而去，啱啱起步咋喎，有冇咁快踩油呀，此等激勵性嘅對話，確實令初跑者心都亂埋，腳都實晒。
當然有啲好窩心嘅，每次出西隧上橋我都話畀自己知，點解我好憎西環（噢，其實嗰度係咪上環），一條接一條嘅天橋簡直係將人類嘅鬥志磨到最盡，咁有一次我又忍唔住響上橋時行起上嚟，喘晒氣就嚟死咁樣，身邊有一位叔叔（總之唔細兼唔應該快得過我嘅）緩緩超前，然後故意同我平排咁話：「就快到嘞，唔好放棄呀，我都得㗎嘞，你實掂呀……」然後仲拍一拍我膊頭先至開步走，結果我都係冇乜點快到，但係叔叔嘅善意令我對西環（定上環）印象又好番啲。
沙士十周年，悲劇冇人想回憶，但當年威爾斯醫院及淘大花園的團結精神亦令人津津樂道，順境波人人識打，逆境波的扶持才最珍貴，跑過馬拉松的人都應該明白。
keyman
now TV主持
mailto:[email protected]