【佔盡商機】
科技巨頭橫行，亦難壟斷智能手機滲透帶來手機應用的巨大商機。首批進入手機App市場的GreenTomato，爭取來自金融、電訊、傳媒等大企業青睞，在寫App和手機廣告的兩大收入倍數遞增，今年有望進位破億，郭秉鑫不諱言要在創業板上市不成問題。
在手機程式市場打滾逾十載的郭秉鑫深信，個人化智能溝通工具未來30年都不會消失，無論以何種形式存在，始終需要有內容和應用。但他覺得，現時為客戶寫App的業務只屬bread and butter（維生業務），做到大眾App才有規模化效益。
暫無意引入創投基金
但無論上市推手抑或創投基金，他暫未有意引入，「太多人搵啦，但若有外面資金入來，第一件事係睇盈利模式，即快搵錢。」他覺得上市公司身不由己，每年要將業績遞加30%，「分到紅股東就拍晒手掌，但做10年咁嘅生活，其實冇做過任何有意義嘅事。」
他形容開發Talkbox的初衷，是為盲人和駕駛者解決即時打字不便的通訊問題，「嗰時我係希望做到一樣令世人對中國人另眼相看嘅嘢，奈何第一個就畀中國人抄返。」但他覺得關鍵並不在於缺乏資本，「科技由零至創出嚟冇乜用，資本唔可以加速令創意更加好，唔係話畀梵高好多錢就畫到名畫，抄襲得，要幾快起貨係取決於錢；搞科技創新唔應該係為引入資金，除非已經摸清條路。」
GT最早期開發的電影App「HongKongMovie」，在港有過百萬用戶，過去三年累計售出逾50萬張戲飛。「開始做嗰時冇諗即時座位表，當年用手機查一間戲院座位表每次要畀3蚊，打破呢個市場規律幾興奮囉。」