巴拉福特嘅占士漢臣喺4強次回合入波，幫球隊以總比數4:3踢走阿士東維拉，係呢支乙組仔打入決賽嘅一大功臣。就喺4年前，占士漢臣仲喺非聯賽球隊效力，周薪250鎊，加埋喺超級市場做兼職搬貨，時薪6.5鎊（約76港元），叫做維持到生活。喺英聯盃決賽賽前，占士漢臣返到去當日做嘢嘅超市，同記者大談以前嘅歲月。