電影《一代宗師》裏面梁朝偉講過：「功夫兩個字，一橫一直，企得番起身先係啱晒。」為多部王家衛電影擔任美指，同為《一》片剪接的張叔平就指，美術雖然都係一直一橫兩個字，不過就絕無對錯之分，要做得好，最重要的是隨心而行，絕不能因為外間眼光而影響自己的判斷。談到與王家衛被外間稱為最佳拍檔時，他坦言與對方的確默契十足，往往王家衛未開口，他已知對方想法，這亦是二人能成為多年好友的原因。
撰文：文國駿
人稱「阿叔」的張叔平日前隨王家衛執導電影《一代宗師》到柏林影展宣傳，並於當地一酒店接受本報記者專訪，大談他的電影夢。阿叔入行多年，曾多次奪得香港金像獎及台灣金馬獎的美術指導獎，更憑《花樣年華》奪得法國康城影展的藝術成就大獎，但他為人低調且鮮有接受訪問，外間更指他說話不多，充滿藝術家脾氣，然而他受訪當天，卻是非常風趣健談，可見要知道一個人如何，不是用耳去聽，而是要親身感受。
阿叔美術成就雖高，但他的打扮卻很隨意，他笑言：「成日拍戲搵衫都見到膩，叫我shopping咪搞，自己着衫舒服就得喇。」阿叔透露今次到柏林心情輕鬆，有空會到處逛逛找尋靈感。問到阿叔何時首次接觸電影？他抽一口煙，認真想了一會後表示：「我諗係我14歲嘅時候左右，我睇完一套電影叫《畢業生》（經典美國電影，由德斯汀荷夫曼演出）之後，返到屋企個心竟然好唔舒服，我下一個星期去戲院睇多次，結果我知道點解個心會唔舒服，原來係掛住部電影，因為《畢業生》個講故事手法好唔同，好吸引我，嗰次開始我真真正正喜歡上電影，會成日去睇唔同國家嘅戲，亦決定要以電影為我職業。」
自信一鳴驚人
阿叔透露其後為數部電影擔任過副導，又有出國讀電影的想法：「其實我覺得冇乜呢個需要㗎，因為你做過一部電影後就會明白個過程，但我只係好鍾意讀電影個環境，起初我爸爸唔係好肯，但最後都畀我去加拿大讀咗三年。」對於讀電影學，阿叔有一套想法，他認為讀書所得的理論沒有太大用處，因每個理論都可以被打破：「我覺得其實冇乜嘢所謂理論，一部電影你可以由任何一部份講起，最重要係出嚟好睇咪得囉。」
三年後的阿叔學成歸來也不是一帆風順，頭兩年找不到與電影有關的工作，第三年他的機會終於來到，導演譚家明找他為林青霞主演的電影《愛殺》做美術設計，阿叔坦言當時信心爆棚：「唔知點解我嗰次好有把握，一啲驚嘅感覺都冇，顏色對比仲做得特別誇張。」此後阿叔的美術風格獲得好評，王家衛更由電影《旺角卡門》開始，便找阿叔成為不二的合作夥伴，最佳拍檔漸漸成型，阿叔說：「我同王家衛喺合作拍《旺角卡門》之前，係已經識咗七年嘅好朋友，基本上我哋每個月都會聚首幾次講吓電影飲吓酒，到有一日佢同我講想拍電影搵我合作，我咪話OK囉，一拍就拍到𠵱家。」問到與王家衛多年來合作的感覺？他坦言對方是一個很聰明而且穩陣的人，阿叔謂：「我同王家衛已經有種無形嘅默契，有時佢未出聲我已經知佢想點，所以佢有時剪唔切或者唔得閒剪片都會叫我幫手。」
隨心懶理批評
談到剪接，外間一直指張震於電影《一代宗師》的戲份被剪了很多，成為片長的犧牲品，身為該片剪接師的張叔平也特意解釋：「都唔可以咁講，張震啲戲份都係差唔多咁上下，唔係差得好遠，係少咗場同梁朝偉打戲囉。」
阿叔這些年來拿過的電影美術獎項多不勝數，問他有否麻木的感覺？他坦言：「唔會麻木，點講都好，獎都係一個好好嘅鼓勵。」近年美術指導方面，拿獎或冒出頭來的新人不多，問他可有着手培育新一代美指？阿叔說：「自己都會用一啲新人班底去做助理，但唔係話教佢哋，係睇吓佢哋自己學到幾多就幾多。要做得好最緊要係真心喜歡你嘅工作，同埋唔好理人點睇，只係做自己鍾意嘅嘢，我一向都係咁，冇理過其他嘢。」一向有傳聞指阿叔在片場甚火爆，他直認不諱：「係㗎！係人都想同啲講一句就明嘅聰明人做嘢㗎啦，好正常，不過呢幾年都有注意到呢方面，收咗火㗎喇！」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/