52歲的歐陽震華（Bobby）年初三凌晨在友人家昏迷，要送入ICU搶救，報稱因急促進食嗆喉致急性肺炎，惟也有指他酒精中毒。Bobby留醫11日後，昨日出院，瘦了的他精神不俗，並跟老婆抱頭痛哭，雖多次承諾飲食會檢點，但Bobby堅持不戒酒，並抵死說：「冇理由我打爛碟炒咗工人。」
歐陽震華於大年初二晚相約陶大宇、謝天華和袁偉豪等到友人家開年，誰料至初三凌晨時分Bobby突然昏迷，由老婆傅潔嫻和陶大宇陪同送入灣仔律敦治醫院深切治療部（ICU）搶救12小時，翌日清醒後要插喉留醫，有傳他酗酒出事，謝天華承認當晚大家有飲紅酒和威士忌，Bobby經理人Lydia則指他因進食時嗆喉致急性肺炎，連日來傅潔嫻衣不解帶到醫院照顧。
肉痛愛妻消瘦
Bobby留醫11日後昨午終出院，約12時15分，戴冷帽和黑框眼鏡的Bobby離開病房，他明顯瘦了一圈，但尚算精神，Bobby向現場逾30位記者鞠躬答謝，又高舉V字和手指公示意無恙，死過翻生的他聲沙沙說：「好番八、九成，多謝前線醫生，嗰晚嗆親到開始唔識呼吸要靠儀器，佢哋盡力搶救十幾個鐘，醫生話最重要靠我意志，我意志都好強，喺ICU醒得好快。」
鬼馬的Bobby擠眉弄眼說：「醒嗰吓──登（瞪大眼），哈哈，夾硬醒咗，當時自己有啲知覺，但手腳唔郁得。」問現在是否仍有不適？他笑說：「身體仲好過之前，𠵱家好精神。」記者指他消瘦了，Bobby深情說：「唔夠我太太瘦，太太真係瘦好多，非常肉赤。」在旁的太太聽到眼濕濕。
問醫生有甚麼叮囑？Bobby說：「以後飲食習慣要檢點，事發前嗰晚同屋企人食飯食得太飽，因為之前不斷開工，嗰晚最鍾意食嘅都叫晒，呢個可能係導火線，之後再去朋友屋企拜年吃喝玩樂，攰攰哋瞌一陣，嗰時可能嗆一嗆，食物殘渣入咗氣管，咁就入咗肺導致呼吸困難昏迷。」Bobby慶幸當時有朋友在場才能走出鬼門關，他說：「如果得自己喺屋企，或得老婆喺屋企，老婆喺房瞓，我一個睇電視瞓着，咁就可能大吉利是！好在嗰晚朋友見我點會咁早瞓，推吓我見我面都青埋，嗱嗱聲打999。」
承諾減少飲酒
對於有傳他酗酒出事，Bobby說：「我唔否認有飲酒，平時都有飲，我係飲但唔係豪飲，唔會飲到醉晒抬走。」問以後會否戒酒？Bobby用工人比喻說：「講真今次打爛隻碟係我，冇理由我打爛碟炒咗工人，同埋酒唔係毒藥，我亦唔想開空頭支票，隔兩個月俾人影到我揸住支酒，我只可以應承大家，以後飲食習慣會檢點，有時開工成兩個月對住叉鵝碟頭飯，過年見到肥牛仲唔連隻碟都食埋咩，幾個月未見過碟海膽，仲唔搏命咩。」
為免親友擔心，Bobby三度承諾說：「應承大家以後食嘢檢點，酒飲少啲，應酬唔通揸住杯茶飲咩，除非換過晒班朋友。」經過今次生死一線，Bobby對人生有新領悟：「條路闊咗好多。」他第四度提檢點說：「今次太太同經理人仲辛苦過我，睇番電視片佢哋塊面仲青過我，當時我昏迷唔知，醒番插滿晒喉，插喉好辛苦，以後咪制，以後要檢點啲。」
Bobby揚言感謝太太，說罷即拉太太和經理人攬作一團，兩夫妻情深對望，一切盡在不言中，傅潔嫻更激動哭了出來，Bobby抱着太太痛哭，經理人也感動流淚，三人相擁飲泣近一分鐘，Bobby叫經理人給紙巾拭淚，並含淚說：「太太真係受驚，佢都要補番吓，我應承佢生活會檢點啲，玩又唔好咁盡，食又唔好咁盡，樣樣七成好嘞。」
下月復工拍劇
Bobby謂出院後休息數天，估計下月初復工拍劇集《情逆三世緣》，他說：「幾場重頭戲喺佛山拍，槍戰追逐，希望順利。」他又伸右手展示手背針孔說：「血管𠵱家扯住晒伸唔直，試過揸槍但未揸得，醫生話冇大礙，食緊抗生素。」他謂現最想返家見愛犬，最後他應要求跟太太合照時，傅潔嫻可能驚魂未定，Chanel手袋跌地，Bobby肉緊地攬着老婆錫一啖，即與記者握手後離去。
採訪：溫敏芝
攝影：黃偉雄
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/