過去十個星期，廣播道冒出麥嘉緯這名字。三十出頭的後生仔，在《星期五主場》逼律政司司長袁國強埋牆角。有人說他惡死，吳志森撰文激讚，靚仔外形更令嚴肅的訪談節目霎時多人追看。想起《精裝追女仔2》老周電視台開拍《唔啱就要打》，靠打搶收視，如今這句套在麥嘉緯身上，一樣講得通，但只係用口，唔係出手。「受訪者一迴避我就追問，再遊花園，就要打斷佢！」
撰文：蔡俊業
攝影：陳盛臣、部份圖片由香港電台電視部及受訪者提供
惡人上身
麥嘉緯的公司同事不是稱他洋名Erik，而是「王子」，意指平時言談舉止皆溫文爾雅；也說實在，訪問那夜，接觸和面談兩小時，他表現正常，偶爾表露出典型書生的腼腆，頗肯定他不是走火爆、寸嘴條路，與訪問律政司司長袁國強時連珠炮發，似要逼他埋牆角的渾身氣勢徹頭徹尾是兩回事。有人形容這個麥嘉緯很霸道、惡死，令袁司長鏡頭前窘態盡現，他不置可否，倒承認自學生時代便好辯成性，年少氣盛，凡事要拗贏。「由中學到大學都係一個好active嘅人，參加好多課外活動，讀大學嗰陣，會討論時事，上莊搞實務工作等等，令到我好慣去同人拗，同人對質。不嬲都有人話我太好辯㗎，以前就更加犀利，同我諗法唔同或者一聽到唔順耳嘅就要拗到贏為止，唔畀位人哋入！」
投身社會後，Erik的戰鬥格已有所收斂，惟獨事情觸及他熟悉的範疇，或者表達意見的人跟自己有關，內容有違邏輯甚至歪理，就像訪問袁國強時，涉及釋法爭議，由於他跟袁繫屬港大法律系同門，向來又經常留意相關新聞，是故一談就會變得肉緊。
重溫當日錄影，訪問劈頭就問袁國強作為資深大律師，對於香港回歸以來頭三次釋法有何意見，司長一直支吾以對，結果四分鐘內，遭麥嘉緯打斷發言八次，「嚴格嚟講係有少少『上身』囉，好Chur（去到好盡）！」但Erik強調，節目的定位是希望嘉賓直接回應觀眾想知想問的問題，倘若對方遊花園就得追問到底，絕無奚落對方之意，反而是借對談交鋒，凸顯受訪者的回應質量。「我只是提問者，佢有能力或者所講嘅係有理據，我哋就通過唔同提問，畀機會佢突出呢樣嘢，倒轉頭你講嘢渣、理由唔充份，亦會一睇就知。」
每逢錄影前一天，Erik都會跟節目策劃尤翠茵，確定錄影時的對談方向，更重要是猜想對方將如何回應，既基於電視製作的考量，也由於應邀受訪的都在政經界舉足輕重，談的內容涉及民生政策大事，難得人家坐定定，豈能錯過任何對質機會？言即，當日袁司長迴避釋法提問，也是他們預計之內，「係有諗過類似答案，但無預計過佢會遊花園、答非所問到一個我要打斷佢嘅程度！呢個亦都解釋到，點解訪問張炳良嗰集個感覺好似無去得咁盡呢？就係因為佢有正面回答緊問題。當官員在其位嘅時候，責任就大好多，對問題無得迴避，無得唔知道，我哋係應該去得盡嘅！」
捍衞批判底線
接過麥嘉緯的卡片，他的職銜是編導，如今能夠單飛負責《星期五主場》的主持工作，絕對跟空降的新任廣播處長有關。毫無廣播經驗的鄧忍光，2011年9月掌管港台，接替黃華麒，外界已視此為政府陰乾港台之舉；至去年底鄧忍光與員工會面時，建議用一對一訪問形式的新節目，取代有27年歷史的《議事論事》，結果遭到內部強烈反彈，《議》得保留，但新節目照舊去馬，猶記得節目出街前，《蘋果日報》港聞版以「港台推喉舌節目」為題的一篇報道，指「港台始終難逃淪為政治喉舌」，到後來節目首播，麥嘉緯西裝筆挺的站在訪問台上講出那段簡介：「作為主持，我只係知道，要做喉舌就要做香港人嘅喉舌！」言猶在耳，袁司長已率先遭KO，想到這裏，內心泛起一個假設，麥嘉緯的咄咄逼人，會否還有另一層更深意義，就是與同事聯手，藉節目中「發難」來表態，製造話題，反過來令政府及廣播處長捉蟲？麥嘉緯頓了一頓，「我明你嘅意思，不過又真係未去到呢個位，至少我係有一種感覺，就係唔可以衰，如果個節目做到比較溫吞嘅話，我哋就覺得無咁好。」他說在港台電視部公共事務組內所有同事，做任何節目，「批判」的那條底線絕不能退，「只要條線一退，今次唔夠批判，下次批判啲嘅時候，質疑聲音就會更大，呢種質疑未必係嚟自『樓上』（高層或政府）。」
相比港台收政府錢，沒有商業壓力，尚且有空間去堅守批判底線、編輯自主，但近年坊間多少同業早已失守？談到新聞審查，作為傳媒工作者，其實有苦自己知，整個行頭越來越難做，Erik直言，這問題責不在記者，而在公眾。「記者嘅堅持一路都有，但既然做調查訪問嘅市民覺得有咁多自我審查，我覺得只能夠靠整個社會要求傳媒唔可以咁，由公眾畀壓力佢哋。」不過，Erik認為近年就算很多跟一般市民有關的議題其實很重要，但他們一樣忽略，關注點非常狹隘，真正關心新聞自由在倒退的只是一小撮人，近年又因為社會太多問題而要上街抗爭，疲於奔命，「我覺得最恐怖嘅就係，就算當一個好關心社會嘅人，近一、兩年樣樣嘢都觸動到你嘅核心價值，就算你有心力、精力，想去做啲嘢，但當有十條柱冧緊嘅時候，你撲埋去邊條柱好呢？」這不是很絕望嗎？Erik便回歸到傳媒和言論自由很重要這一點上，「香港生活逼人，每個人嘅價值觀唔同，所以傳媒只能緊守崗位，等香港人知道，言論自由、新聞自由，甚至警權同埋司法獨立呢啲價值同原則，係同佢哋生活息息相關囉，令到更多嘅人醒番，而如果係醒咗嘅嗰班，就算你唔起身吶喊，至少都同身邊人多講兩句，叫醒佢哋。」
Make a difference
作為節目主持，掉轉頭接受訪問，麥嘉緯的眼神告之，他並不習慣。問他，覺得哪一集的表現自己也頗滿意，他沉默思索，坐在身後，其上司尤翠茵搭訕：「通常都話未做嘅集係最好，哈！」他恍然大悟，邊笑邊點頭：「好好呀，呢個答案好好呀，死啦，我真係要學吓呢啲答題技巧。」或許顧及己身的嚴肅專業形象，我覺得他答得不夠放，於是改從閒餘興趣入手，點知，Erik說他最愛行山、睇書、聽廣東歌，睇戲？還要不好英雄片和動漫，表裏如一，貫徹新聞人Style，真的沒有落差？直至他自爆近期聽Shine，我來不及反應，以為聽錯，但眼見他神情雀躍，就知道有好料了。「因為係嗰個年代嘛！我有睇佢哋嘅演唱會，其實好多首歌都鍾意，《燕尾蝶》、《曼谷瑪利亞》入面嘅社會觀察同思考，可以話比謝安琪更早。」
Erik口中的「嗰個年代」，正是入讀港大法律系，兼住在大學堂的時代，「點解揀住U Hall呢？因為HKU嘅理念就係講『博盡』，而傳統嘅hall就更加重視呢種價值，而U Hall有一個類似motto嘅就係講我哋要make a difference，無論將來你喺咩崗位，都希望為社會帶來改變。」而正因為這種價值觀，決定他05年畢業後棄做律師，再讀新聞系碩士，投身傳媒行列。「我揀讀law係因為有興趣，覺得對做任何職業都有用，而且法理嚴謹清晰，仲係維護公義嘅工具，不過我成績唔標青，當時已經無諗住做律師，要做到make a difference，喺第二行我會有信心啲！」如今是最壞的時代，可他仍堅守在大學學會的座右銘，為自己，為社會帶來好的改變，冀以善變天。
