邱淑貞（豆斗）位千金沈月，眨吓眼已經11歲，睇見佢食魚蛋粉都要着到靚一靚，貪靚程度十足阿媽。講開又講，14年前，當年只有31歲嘅豆斗，同時裝店老闆沈嘉偉喺日本舉行婚禮，好似都唔係好耐嘅事咁。話說99年10月31日，豆斗同沈嘉偉飛到去日本東京台場嘅Meridien Grand Pacific Tokyo酒店舉行婚禮，當日嘉賓粒粒皆星，除咗吳君如、梁家輝、曾志偉同上山詩鈉呢啲「派對鐵腳」外，連張國榮同張曼玉都畀面到場，認真墟冚。
揸跑車行大運
貴為I.T老闆，沈嘉偉出場梗係要型，佢同豆斗搞掂晒接新娘同結婚儀式後，就揸住架法拉利開篷跑車，載豆斗喺富士電視台繞一圈「行大運」，之後仲經過著名談情景點彩虹橋，認真浪漫！聽聞嗰次婚禮足足使咗200萬，當時已經算喺世紀婚禮嚟啦，不過對於沈嘉偉嚟講，呢啲濕濕碎啦！
撰文：阿Wow
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/