「鵝」（史雲斯）無恥，上周狂吞紅軍5蛋，亦證季尾波出來了！季尾波重球隊戰意，有時遠遠凌駕本身實力及排位，戰果反常係常事。收拾心情，今次重心取迎戰韋根嘅雷丁。全心護級，唔使估估吓；平手盤捧雷丁。
推敲戰意緊要，但阿仙奴近期完全撻唔着係實力問題，敗仗連連，作為擁躉除了繼續默默支持，抵住敵隊球迷一陣冷嘲熱諷外，還忌不理智地仍傾注支持佢有日會反底；相反，要跟紅頂白，雷丁可多望兩眼，佢哋踏入2013年，個馬達越撻越行，錄得9戰5勝1和3負，落敗3場全部係作客，輸畀熱刺、史篤城同剛戰喺盃賽負曼聯。最令人印象深刻係聯賽表現續有進步，近3場聯賽主場兩勝1和，全部係完場前5分鐘奠勝或逼和對手；逆境下戰意驚人，排尾3但同前面對手相距唔遠，餘下12場波，場場護級戰咯。1月入4將，但表現好嘅全屬舊將，球隊戰意泉源，唔係昆士柏嗰類雜牌軍可比，主場3戰拿7分入球由3位射手普格恩耶克、方祖同占美基比包辦，下游球隊嚟講，戰績叫卓越！
對手韋根排名更低雷丁一級，兩周前1:4大敗車仔，被對手賓帥洩露3-4-3陣式中，主力中堅卡達維轉身慢、剛食回頭草但已近33歲嘅另一中路守將舒卓拿唔穩陣等弱點；韋根主帥馬天尼斯嘅歐陸踢法一向進取，有前冇後，上季尾全賴打低曼聯大振士氣後起勢贏，不過今季仲有冇咁多人讓路，真係大有疑問。雷丁上仗英足盃僅負曼聯，而韋根則作客大炒英冠哈兵，但今周返聯賽，會有唔同戰況。首循環韋根完場前靠祖迪高美斯完成帽子戲法，絕殺雷丁；以後者近期末段狂入波氣勢，話唔定歷史會倒轉。呢場波博足3注，入球「大」及雷丁贏波波膽兼捧。
收費台縮皮到竟然連英聯盃決賽都唔播，個人投注意欲近零；但奸有奸輸，希望明天擺番強陣嗰隻「鵝」甩毛，輸畀乙組巴拉福特，締英國足球史上震驚一頁！
(下次見報日期：02/03)
蘋果波神