亞視噚日喺大埔總台舉行新春團拜盆菜宴，雖則全台藝員出席，但四圍都坐唔晒，加埋記者席都係得六圍，連聲勢都同收視掛埋鈎，上年底無綫豪擺330圍盆菜宴，亞視呢鋪真係蚊髀同牛髀，認真失威。
以前六叔邵逸夫出席無綫活動，梗有幾個港姐傍住左右，亞視執董盛品儒都唔輸蝕，都有兩個亞姐陪坐㗎，佢哋係冠軍陳彥蓉同亞軍齊真晨，盛品儒喺現場豪派百元利是，總算挽回番啲面子。
亢帥克中大獎$500
現場有得食仲有獎抽，大部份係100蚊超市禮券，200蚊現金獎都有幾個，司儀形容為終極大獎亦不過係500蚊，都唔知係咪造馬，大獎最終俾亞洲之子嘅亢帥克抽到，佢仲興奮到即刻將個喜訊公佈微博㖭，之後再嚟個藝員表演助興，但睇嚟睇去，表演班人個樣真係陌生啲囉！
撰文：洪紅克
攝影：魯萍
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/