官場奶媽林鄭月娥星期三晚去北京，率領特區代表團出席噚日有關深圳前海嘅會議，仲同好多內地部門見面。明明係光明正大嘅訪京之旅，但林鄭就鬼鬼祟祟，事關政府除咗喺佢上京前一日嘅夜晚，發稿話佢同官員會出訪之外，竟然無向本港傳媒以及本港駐京記者作出任何採訪安排，好似唔見得人咁！
記協促公開交代事件
記協噚日發聲明，表明不滿政府今次訪京行程嘅處理手法，覺得無助新聞界採訪，亦擔心削弱公眾知情權。成個行程咁保密，公眾又點知中央同港深兩地就發展前海、跨境規劃等事件嘅詳情呢？八方聽聞成班駐京記者都好㷫，覺得林鄭與其偷偷摸摸，倒不如唔好上京啦。
記協力促特區政府公開交代事件，仲要承諾日後就同類活動，都要作出合理嘅採訪安排，確保市民嘅知情權唔受損害。