中美一齊收水憂慮，對市場短線打擊當然唔細。睇圖表，去年9月至今，恒指噚日首次明顯跌穿保歷加通道下軸，走勢比11月調整市更差，可能正式進入中線調整。
會跌幾多？港股由去年6月升到之前高位，升了三成約6000點，如果恒指由高位24000水平，跌番二三千點，作為中線調整都算合理。以走勢最近似嘅2004年4、5月情況比較，恒指今次跌幅就可以係升浪嘅一半，即係累積跌3000點到去21000，咁啱就係250日線附近。係咪咁發展？只有見步行步，其中可以留意大市對重大壞消息嘅反應，如果出面講到死人冧樓，恒指都只係跌500點左右，而個股只跌三幾個巴仙，咁就證明後市跌極有限，可以冷靜等撈貨機會。至於成手貨嘅話，暫時可以將啲同大市關連性大嘅股份，換入啲關連性偏低嘅股份，甚至可以逢反彈減持。
首站先睇2.6元
長實（001）雍澄軒酒店當住宅賣，單嘢搞到咁大，有人驚發展商向業主濫收費用，或者賣完之後酒店會變成棄宅。不過，晉佳覺得長實度到呢條絕橋，斷唔會咁快做壞招牌，相信日後嘅經營配套會做得好好睇睇，塞住反對者同政府把口，等政府唔會立法規管，自己同行家手上嘅酒店就可以長賣長有。
市面上成手同類型酒店嘅帝盛酒店（2266），究竟會唔會照辦煮碗拆售？佢2011年底總房間數目3,901間，其中香港佔1,900間，相信部份酒店可以拆售，越拆售得多越贏得多。至於2014年8月或之前開業嘅酒店，房間有3,108間，發展中嘅香港酒店有1,329間，呢批照計會保留作酒店用途。
帝盛市值46億元，總資產85.3億元，佢嘅香港房間面積大約百幾至二百幾呎，假設現有酒店房間每間平均值150萬元，單計香港就值30億元，相當於市值六成，如果部份能夠拆售套現，筆錢又可以尋找新嘅酒店發展機會，除笨有精。由於長實單嘢隨時改變市場對於帝盛嘅估值方法，所以股價呢轉咪估頂，先博上2.60元。
晉佳
本欄逢周一、三及五刊出