早兩日先講濠賭股股息冇乜邊隻吸引，美高梅（2282）即刻摑唐牛一巴，宣佈派發特別股息每股1.02元，現價息率逼近6厘。有股評人話此舉明益主要股東何超瓊（以持股27.4%計，收息近11億銀），有大花筒之嫌，唐牛對此不敢苟同，事關美高梅派特別息唔係第一次，去年全年亦派81.6仙，雖然每次皆用特別息名義，擺明唔想予人恒久派息印象，但濠賭股現金流之強，在上市公司中數一數二，派息回饋股民對股價肯定有幫助。
睇番美高梅盤數，全年盈利增長38%至45.3億銀，下半年盈利較上半年倒退27%，相信與路氹新場越開越多，搶走生意不無關係。唐牛新春過大海，發現美高梅人流比想像中旺，起碼好過隔籬嘅永利（1128），在品牌效應下，未來路氹項目應有作為。
瑞信出咗報告，以2013年EV/EBITDA計，美高梅估值較同業有25%折讓，配合6厘息墊底，維持跑贏大市評級，目標價19.80元，潛在升幅14%。
唐牛