渣打馬拉松周日開跑，浸大校長陳新滋都係10公里跑手。佢上年嘅成績唔錯，個幾鐘就跑完，但佢話今年成績未必好過舊年，原因相信大家未必估到。陳校長話喎，呢排忙於力爭前九龍塘李惠利工業用地起中醫學院，所以練跑時間都大減。
重申爭唔贏就辭職
講講吓，佢又話早前傷風，即時搵咗中醫學院教授刮沙兼診症，食咗兩日藥後，鬼打都無咁精神，證明中醫學院幾咁重要，認真hard sell。佢重申爭唔到地會辭職，仲會發動校友一人一信聲援㖭。
東華學院噚日亦同傳媒團拜，校長汪國成變身「小城大廚」，炮製賀歲甜品「香江煎堆」炸雪糕。另外，鄉議局為香港求得下籤，成為全城焦點，但汪國成一啲都唔迷信，話與其對付小人，不如主動攻擊小人。講完呢番話，仲向每個記者送出一盆小仙人掌做新年禮物；唔通呢棵仙人掌，就係攻擊小人嘅最佳武器？