要數政壇嗜酒中人，除咗唐唐，都唔少得自由黨榮譽主席田北俊。但同唐唐好唔同，田少話佢唔算買得好多酒，所以無酒攞出去拍賣。但原來佢唐唐以及另外一啲政商界名流，定期都有個八人紅酒會，每次都由其中一位參與者，攞出一支靚酒嚟品嚐。
八個嘆酒最perfect
到底紅酒會有乜猛人？田少拒絕透露，但八方相信，肯定唔會包括「冇料到」嘅人囉。田少噚日同成班自由黨立法會議員及揸fit人，包括主席周梁淑怡同榮譽主席劉健儀，一齊同傳媒拜年，席間話題離唔開唐唐。
田少透露，原來佢定期會同唐唐以及另外6個名人搞紅酒會；點解係8個人而唔係10個或者12個呢？因為一支紅酒，通常啱啱好斟滿8隻杯，所以8個人一齊嘆酒就最perfect。
佢哋每次聚會，都會由其中一個人帶一支靚酒，講解吓呢支酒有乜咁巴閉，例如產地、年份、釀酒師等；而每次紅酒會，主要都係食豬同牛，好少食魚，因為同紅酒唔多夾。話明紅酒會，當然都係以講酒為主，但八方相信，一班政、商界人士摸住酒杯底，唔會忍得住口唔論政啩？唔吹水，又點知邊個人最冇料到？
雖然同唐唐一樣愛紅酒，但田少話佢唔會攞紅酒出嚟拍賣，事關佢買得嗰啲，都係自己鍾意飲嘅，唔似得唐唐去到邊，都會大量入貨咁博愛。佢估唐唐拎啲酒出嚟賣，不過係因為酒太多、兼且費事啲酒過咗黃金享用期，賣畀識貨之人更好。
mailto:[email protected]