主場慘敗拜仁後，阿仙奴剩番隻腳指尾仍留在今屆歐聯。連續8年四大皆空恐成事實，令球迷要雲格落台的聲音又再壯大。我卻是唱反調的，認為最錯的，不是他。
從來炒一個人容易；找誰接任卻是最難。如果資源相同，我相信世上難有一位領隊可以比雲格做得更好。阿仙奴管理層營運方針是「量入為出」，確令他們成為三數間有盈餘的英超球會之一；但這背後卻隱藏了另外四隻字：「獎盃免問」！
識慳錢仲識「變錢」
雲格無錢買星之餘，還要承受年年有主力離隊，卻仍能維持連年打入歐聯主賽圈，實為神乎奇技。大家做同一行生意，一間競爭對手曼聯瘋狂負債；另外兩間曼城車仔更有「無限資金」，要掛住「量入為出」大前提，兵工廠點爭盃？
雲格另一「神蹟」，就係除咗慳錢，仲識「變錢」：賣走韋拉，以100萬鎊身價的桑治頂替；賣走亨利，唔使300萬鎊找來尹佩斯；賣走法比加斯，索性以青訓產品韋舒亞代之；而上述的桑治、尹佩斯等，最後又可以高逾10倍價錢轉售。或許管理層一直在等，雲格快啲再施變錢魔法。
管理層態度要改變
但是，近年連變錢魔法都失靈了，查馬克、謝雲奴、基奧特……貨不對辦兼無得升值。有人認為雲格眼光不再，我卻認為是球會出的考題太深了。09年開始，賣走主力的頻率太高，數量太多。雲格就算識變魔術，畀時間佢唸句咒語都要啩？
但以近年主力每年「打孖」流失的速度，真係神仙都難變。所以，若想捧盃，要變的是管理層的態度；否則，變走雲格，相信兵工廠命途將更坎坷。
方柏翹
now足球評述員