公民黨陳淑莊嚿年喺個人talk show《戴錯嘢夫人》，搵嚟新晉名嘴兼寸爆嘴嘅曾志豪做嘉賓，為護苗基金籌得唔少善款。呢對好拍檔今年再度一齊靠把口籌款，但今次籌款受益人係公民黨，事關公民黨今年4月中會搞籌款晚會，佢哋嘅棟篤笑環節，肯定會成為全晚高潮；如果余大狀肯開金口唱歌，善款肯定更多。
籲有心人捐拍賣品
棟篤笑對Tanya嚟講，一啲難度都無，佢話𠵱家政壇咁多騎呢搞鬼嘢，唔怕無題材；反而佢𠵱家最頭痕嘅係，身為公民黨副主席喎，點都要幫手搵人捐拍賣品。Tanya話，歡迎各方有心人送上好嘢，畀佢哋喺籌款晚會拍賣，幫幫公民黨。