（喜）萬眾期待，千呼萬喚，「萬人迷」碧咸好有可能喺嚟緊星期日首次幫巴黎聖日耳門（PSG）上陣，主場對爭標勁敵馬賽。PSG教練安察洛堤話：「碧咸帶畀我哋經驗、級數同埋專業精神，呢啲都係我哋所需要嘅。我對球隊現有嘅戰術好有信心，唔會為佢特別變陣，佢都可以打番踢開嘅防中或者右邊。」𠵱家PSG以51分排緊榜首，馬賽就以46分排第3，所以今場都可以話榜首大戰。
馬賽嘅加納前鋒阿休好期待同碧咸交手，「佢係偉大嘅球員，我細細個都睇佢踢波，見住佢不斷捧盃。」不過，馬賽嘅英格蘭中場祖爾巴頓就話37歲嘅碧咸回晒塘，叫隊友唔使咁緊張；但呢位球壇怒漢麻煩多多，喺周四操練同隊友艾達拿發生口角，都唔知到時會唔會俾人「雪藏」。另外，有消息指碧咸將會成為中超嘅形象大使。至於碧咸個大仔布魯克林亦有跟老竇去巴黎，仲着起PSG球衣自己練波。