張國榮逝世10周年，佢嘅好友陳淑芬將會幫佢搞一連串紀念活動，下月31日喺紅館舉行「繼續寵愛．十年．張國榮」音樂會；4月1日再喺紅館舉行紀念晚會；而下月28日至5月1日就喺銅鑼灣時代廣場舉行展覽，歌迷摺咗過百萬隻紙鶴紀念，仲會申請列入健力士世界紀錄大全。另外仲有紀念品賣，包括限量3,000個嘅12吋人偶，扣除開支將捐作慈善用途。而攝影師夏永康推出攝影集，哥哥生前親密好友唐鶴德仲提供哥哥從未曝光嘅生活照。
張學友出席
陳淑芬噚日同施南生喺尖沙嘴舉行揭幕儀式，施南生講起詳情時，感觸到眼濕濕，佢話：「音樂會邀請咗好多哥哥好友嚟。有位紅星主動打畀我confirm細節，話安排佢做乜都得。」聽講有超過十個單位歌手答應演出，問梁朝偉會唔會出席？陳太話：「我真係唔講得，上次五周年活動偉仔有嚟。」據知張學友等人會出席，問唐生會否到場？佢話：「你哋再問佢就唔會嚟喇﹗」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/