踏入蛇年，股評界藺常念（藺Sir）同郭家耀（Matthew）都有新開始。今年65歲嘅股壇「開心果」藺Sir，舊年年尾先話可能退休嘆世界，點知今年1月底正式離開靈獅後，轉頭又跳番入股海，去咗一間本地證券行做負責人員（Responsible Officer ，俗稱RO），話要搵個寄託，「如果唔係日日等日出日落、食飯瞓覺，好容易衰老㗎！」
返新工 唔會入股
藺Sir話，新竇係間金融集團新開設嘅證券部，有一定客底，申請緊牌照，唔開得名住，佢只係打工，「我咁嘅年紀唔會擺錢落去啦，啲錢留番嚟養老㗎！」至於同藺太個嘆世界計劃，兩人農曆新年跟團去峇里同陽光玩咗一個星期遊戲，咁就當交咗差。
之前缸湖傳聞多多，呢邊傳佢同靈獅舊拍檔黃偉康（Andrew）不歡而散，嗰邊又傳佢哋再度合作。藺Sir笑住回應，話同Andrew冇問題，離開係要為靈獅「止血」，「我哋呢啲人工太高嘛，一走負擔即刻輕咗好多。」照咁講，靈獅股東真係多謝佢。
另一位股評人Matthew離開海通後，最近成為中國銀盛財富管理首席策略師。佢經朋友介紹加入銀盛，本月初返工，家陣接觸內地私人銀行客戶多啲，走在最前線。咁有冇加人工呢？佢笑笑口話：「好些少啦！」Matthew朋友記得叫佢請食飯啦。
李華華
mailto:[email protected]
新game出爐 ～ 快啲試下自己有無辦法上車啦！
【「樓」年運程小測試】
http://www.tomonews.net/game/hkhousingpolicy/