黎燕珊有多年養狗經驗，雖然試過被狗咬，但仍然愛狗，因為兒子想養玩具貴婦狗，她就買了一隻，狗仔卻搞大了鄰居貴婦狗女個肚，結果多了一個新成員。由於養狗經驗豐富，黎燕珊笑言就算將來沒有工作，也可當個寵物保母。
撰文：魯萍
黎燕珊幼子想養狗，但因她要工作，並獨力照顧一對子女，根本沒時間兼顧，所以跟幼子約法三章，只要兒子一年內學業能獲進步獎，就達成他的心願，結果兒子不負眾望，母親遂履行承諾，黎燕珊說：「不過事前講好協定，阿仔要自己照顧番隻狗，開頭都有做到，但最後咪又係我照顧，不過係開心嘅！」
發情期要包尿片
養了玩具貴婦狗仔「史力仔」後，因為鄰居有隻雌性同種貴婦狗，在主人不知情下牠們交配了，黎燕珊笑說：「其實呢個係秘密，一直唔敢講番畀個主人聽，史力仔搞大咗人哋隻狗女個肚，生咗五胞胎，因為最細嗰隻女心口有笪白毛同爸爸好似，所以鄰居送咗畀我養。不過狗媽媽過咗段時間就過身，嗰次咁啱我見到狗媽媽抽筋，主人唔喺屋企，即刻帶佢去睇獸醫，結果都係救唔番，原來狗媽媽生完咁多隻，多狗仔食奶，令媽媽脫鈣，所以應該要補番鈣，好可惜。」
史力仔也有過慘痛經歷，黎燕珊重提舊事依然氣難下，她說：「我住元朗，嗰次拎史力仔去沖涼剪毛，而我做完亞姐活動就去接番佢，畀錢找數時見到櫃枱有支消毒藥水，已經心知不妙，發現史力仔個肚有個窿兼冇咗塊皮，仲要係我發現畀埋錢先同我講，話剪毛時開風機佢驚，一郁就唔小心整親，之後睇完醫生，因為戴咗頭罩，但佢成日用隻腳去抓傷口，搞到傷口發炎含膿，最後我諗到用紗布綁住佢對腳仔，加上我悉心照顧先好番。有過嗰次教訓，以後都要搵有信譽嘅舖頭。」
至於狗女Ally也令黎燕珊擔憂：「Ally夠日子做絕育手術，我就帶佢去獸醫度搞掂啦！點知抽血後發覺好難止血，先知原來係天生白血球過低，如果做手術驚會流血不止，醫生提議等到兩歲先好做手術，但呢段時間又驚佢同爸爸搞埋，咁咪亂倫，惟有每次佢發情時就包尿片，兼要全天候贒實，絕對唔能夠出意外。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/