仲跳Gangnam Style？過時啦！家陣梗係玩Harlem Shake啦！連曼城班球星都嚟湊熱鬧，日前喺球會健身室都跳番一份，實行在大戰車路士之前鬆一鬆；最抵死係佢哋後衞高拉洛夫，喺班隊友跳得興高采烈嘅同時，但佢就扮晒cool，仲擺出一個非常不屑嘅樣子㖭。
蜘蛛俠聖誕老人出齊
Harlem Shake風直吹英格蘭球壇，繼英冠水晶宮嘅啦啦隊喺更衣室大跳呢隻勁舞外，就連曼城班球星都唔執輸。喺隻video入面，曼城班球員初時喺度簡單嘅熱身運動，之後就群起一齊玩Harlem Shake，其中仲有唔同造型嚟跳，例如係Iron Man、蜘蛛俠同埋聖誕老人等等。據報有份參與曼城球員，包括迪斯高、赫特、占士米拿、尼史葛、米卡李察士、史葛冼佳亞同埋高拉洛夫等等；最搞笑嘅係，高拉洛夫喺個video入面玩另類， 冇同隊友一齊跳之餘，仲蹺埋雙手企喺度扮晒cool。
曼城班球員輕鬆完，當然要認真投入練習，以備戰下個星期日主場對車路士場英超大戰。𠵱家佢哋落後「1哥」曼聯12分，如果呢場波有乜冬瓜豆腐，幾可肯定同英超錦標講拜拜。由於事關重大，所以領隊文仙尼亦要求班球員喺禮拜三加操，一日要操兩課，不過泰維斯、阿古路同大衛施華等都冇怨言，而且仲非常落力㖭。
林伯向200球進發
另外，噚晚場歐霸盃，車路士中場林柏特由於休戰冇份踢，所以如想入佢喺車仔嘅第200球，就要等對曼城場英超先有機會。話時話，如果佢喺呢場入3球，就會追平譚布寧喺車仔嘅入波最多紀錄（202球），我求大俠希望佢會成功啦！