潮流興保育、活化古蹟，由香港報業公會同香港新聞行政人員協會合作推動嘅新聞教育基金，早前向政府申請將上環必列啫士街街市大樓，活化成新聞博覽館，介紹吓香港新聞發展歷史，定期舉行吓新聞教育講座，同埋租吓場地俾人搞吓記者會咁。八方聽聞，呢個咁有教育意義嘅計劃，終於獲政府開綠燈，好快會有好消息公佈。其實新聞教育基金今次取得呢個活化項目，過程一啲都唔容易㗎，雖然殺入最後兩強，但對手據聞係相當有創意嘅春田花花教育基金，新聞教育基金最後勝出，八方在此真係都要講聲恭喜！恭喜！