回憶總是苦澀的，上年揚威釣魚台嘅啟豐二號，原來係條「賊船」，去過保釣嘅都冇好下場。你愛國家但國家唔愛你，愛國就冇好結果。講緊嘅係上年搏晒老命登上釣魚台宣示主權嘅七位愛國勇士，𠵱家其中四個英雄都官司纏身，連保釣幕後大金主Dream Bear都俾老廉請飲咖啡，隨時監都有得坐。所以話無論愛國定愛狼，都係冇好下場。
「阿牛」曾健成呻喺共產黨統治下，佢連回鄉證都冇，但係對釣魚台主權寸步不讓，如果中共新任領導人習近平退縮，香港保釣人士會繼續出海。
吳爽
船主 羅堪就：非法出境
控罪：上年8月12日坐保釣船「啟豐二號」去釣魚台搶灘登島，事後船隻喺中國海監船護送凱旋歸港，船主獲市民夾道歡迎，但近日被控非法出境，下個月要上庭，隨時要坐監。
保釣成員 古思堯：焚燒國旗
控罪：上年參加「追究李旺陽死因」遊行焚燒同塗污國旗，今年元旦倒梁遊行再塗污國旗同區旗，本月初判監九個月。阿古喺法庭話中共係殺人政權，比起塗污國旗只係小事，坐監係光榮。
大金主 Dream Bear：涉貪受查
控罪：涉及上市公司東方明珠石油案被廉署拘捕，寫密函叫狼英唔好過橋抽板，要向廉政專員白韞六「打招呼」，呢封信令廉署再開file，噚日請佢返總部飲咖啡，可能有更多控罪。
保釣成員 阿牛曾健成：非法集結
控罪：除咗民間電台涉嫌非法廣播嘅官司之外，今年元旦參加倒狼大遊行，佔領中環喺馬路中心打邊爐，最後被拉返差館，罪名係非法集結。阿牛噚日申冤：「煮幾粒魚蛋食啫，咁都要拉？」
船長 楊匡：警方通緝
控罪：上年4月1日去中聯辦參加「抗議中聯辦亂港」遊行，被指遊行結束後衝擊警方封鎖線，事隔十個月，本月初警方話明會告佢「非法集結」，但未向警方投案，家下被通緝。