八方噚日早起，聽商台節目《在晴朗的一天出發》，忽然覺得有把聲好鬼熟，佢啲潮州腔調好似喺邊度聽過咁，不斷鬧狼振英冇料到。嘩！呢個唔係誠哥咩？致電電台烽煙節目，唔係玩到咁寸呀？
八方仔細聽，呢位A貨誠哥自稱係林先生，話啱啱用400萬買咗個雍澄軒單位（應該係酒店客房）。點解腔調咁似嘅？可能係誠哥同鄉啩，所以有啲潮州「架己冷」口音；語氣都似到十足十，唔排除係誠哥粉絲，耳濡目染受影響。
「A貨誠哥」林先生喺烽煙期間，直認信李嘉誠多過信特區政府咁話喎：「李嘉誠衰極都有嚿磚（樓）畀我，特區政府就得個噏字」，仲話「好後悔冇買多幾間（雍澄軒）」㖭，繼而大鬧梁班子冇用，「唔信呢個政府有啲乜做得出」，仲將矛頭指向劏房波，話佢連老婆嘅劏房都搞唔掂，「梗係流啦」。
買車買樓文章是流的
節目出街之後，唔少人都話林生把聲真係好似誠哥喎，但相信誠哥要發炮，都唔使喺呢個平台啦，佢自己都有個新城電台，使乜搵商台？有網民就話呢位林先生嘅潮州style同誠哥似到十足十，越聽越好笑。
A貨誠哥呢頭出動，正版誠哥嗰頭發聲明，澄清一啲網上傳言。事關網友近日瘋傳一篇由李嘉誠發出，題為〈李嘉誠教你五年內買車買房〉嘅文章，建議將月入分成五份，五年內就可以買車買樓。李嘉誠基金會噚日澄清李嘉誠從未發表類似言論，又話網上不時流傳好多所謂誠哥嘅論點或者箴言，但好多都係流嘅。A貨誠哥，真係何奇多。
mailto:[email protected]