【銅鑼灣時代廣場、倫敦】余文樂同吳雨霏拍拖單新聞通晒天，兩個人飛咗去英國倫敦玩，仲成為當地華人同香港旅客偷拍嘅對象，噚日微博又有人貼咗一張佢哋兩個喺倫敦街頭漫步嘅相，都可算係全民都係狗仔隊。
驚青閃人
而同樂仔傳過緋聞，仲有過情慾留言嘅𡃁模王璐瑤（LuLu）就一於少理呢位舊緋聞男友嘅新聞，shopping大過天。前日下晝5點半左右，LuLu一個人去到銅鑼灣時代廣場嘅連卡佛行街。LuLu好專心喺度睇鞋同手袋，唔使好耐已經去櫃位數錢，大大話都見佢數咗六、七張金牛找數，女人錢真係易賺。攞住一袋戰利品嘅LuLu仲未滿足，行咗去化妝櫃位睇嘢，佢一邊講電話一邊睇，好似好苦惱咁，不過當佢發現有記者影相，就連嘢都唔買急急腳轉身走人，都唔知佢驚乜。
另外，LuLu幫有線拍緊個節目，安排跟兩位武術高手學詠春同截拳道，仲俾師父讚佢外表斯文，估唔到打落咁狠，真係人不可以貌相㗎。
採訪、攝影：梁繼光
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/