白鴿黨立法會議員涂謹申，噚日帶住15個月大嘅囝囝涂信之到立法會，同一班uncle同auntie拜年。唔少議員見到肥嘟嘟嘅信之，都不分黨派群起上前大讚好得意，繼而派封大利是，包括「梁粉」工程界議員盧偉國同民建聯梁志祥等。
過去因為硬推23條惡法，同阿涂有過好深牙齒印嘅新民黨主席葉劉淑儀見到信之時，都即時上前向信之派利是，仲想嚟個抱抱㖭。點知信之笑住收完葉劉利是後，即刻轉身拒絕抱抱，點都唔肯騷葉劉，慘食檸檬嘅葉劉惟有尷尬笑幾聲。有口痕友話估唔到信之人仔細細已經咁精靈盞鬼，係因為得到阿涂遺傳，定係阿涂胎教有方呢？