先要恭喜「牛下女車神」李慧詩今日出戰世錦賽前有好消息，因為喺周一剛結束嘅香港傑出運動員「八傑」選舉公投結果中，佢遙遙領先其他香港精英，穩佔第一位，睇怕佢喺下月14號頒獎禮贏八傑同「星中之星」應該冇問題。現正喺凍到攝氏零度以下嘅白俄羅斯參加世界場地單車錦標賽嘅佢，今日出戰500米計時賽，幫香港爭第一個世錦賽女子組冠軍，如果大家仲記得，慧詩其中一個成名作，就係喺2010年廣州亞運會幫香港攞當年第一個金牌，正正喺500米計時賽。慧詩加油，全香港人都會支持你嘅！至於以前世界冠軍郭灝霆為首嘅男子團體追逐賽，港隊以4分11秒585位列第12名，無緣名次賽。（now676台今日11:59pm直播）